在「祐漢熟食中心」與老伯閒談

 

在「祐漢熟食中心」與老伯閒談

2013年7月13日下午4:37公開累積瀏覽 66

在假日好喜歡跑去「祐漢熟食中心」揾食,那裡甚具街坊特色,適合我這個升斗市民。 而且,一向以來,我對飲食沒什麼特別要求,普通就好,幸好老妻都隨得我,對於選擇食飯的地方,沒有太多意見,所以今天我倆又來到這裏開餐,值得一記就係同一位老伯的談話。

放在枱上的是六両裝的双蒸白酒,一天要飲兩瓶,老伯酒齡四十。

這位老伯坐在我的對面,我正在等待老妻侍候飲食,閒得無聊就同老伯攀談起來,只見他將一小瓶双蒸白酒放在枱面上,於是我首先開口問他：

「老伯你鍾意飲番兩杯咩？」「一日飲幾多樽呀？」
老伯看我一眼,我馬上堆滿笑容,展現出一臉誠意。停頓一會,老伯見我笑臉迎人,似乎解除了心理防線, 他開口回答我說：

「呢d係六両裝,一日飲兩樽啦！」

我再問他：「你飲酒有多長日子啦？」
「廿幾歲仔就飲咯,飲咗40年。」
「你今年六十幾？」我問。「六十六歲。」
「白蘭地好飲還是白酒好飲？」對飲酒我係外行, 所以我問了一個蠢問題,老伯反應強烈,佢大聲咁講：

「梗係白蘭地好飲啦！價錢都差好遠啦！」

接着, 我留意到老伯口袋有一包煙,於是我再問他,說時不忘稱讚老伯兩句：

「你又煙又酒, 身體都算唔錯喎。」

老伯卻說：「身體好多毛病囉,中氣唔夠..........。」

言談間,老伯說到了退休後的生活費。
我說：「澳門人退休後生活還過得去啦,政府都負責咗好多老人洗費。嗱！每月收取嘅 "社保老人金"、一年一次嘅 "生果金" 同 "現金分享" 還有 "中央公積金", 全部計晒, 每人每月平均都收到接近五千元啦！係咪？」

出乎我意料, 老伯咁話：「只夠我茶、煙、飯。」

"粥" 配 "酒" 有這樣的配搭嗎？



老伯告訴我,他未到65歲就提早領取社保老人金,比法定年齡65歲早了幾年,所以只能打折享受。

我好奇問他：「咁,你每月收多少？」
「$2,250」老伯說出這個數目。

顯然,老伯是抱著早收早落袋,身體何時會出狀况,真係誰都說不準,袋咗先講。

老伯將白酒倒入碗內慢慢再飲。

早收或晚收,孰優孰劣,純粹個人選擇,賭一鋪,提早享用,錢是少咗d,但係用掉才真正算是自己的財富, 否則財富只不過是一堆數目字而已。如果人老得變成老懵懂,只怕到時最有可能嘅, 就係住在老人院等人餵食,而唔係坐在茶樓一盅兩件,因為到時就連自己家門口都出唔到咯,真應了那句〝人在天堂,錢在銀行〞。難怪好多老人家都選擇在60歲提早計數, 識諗呀！

                                 ----完----