我與交通輔導員C9的 "過節"
澳門採用交通輔導員的做法已經有好幾年嘞，當初由於市面經濟不景， 有好些人失業，有人提議政府僱用一批臨時工來輔助交通警員的執勤， 政府亦從善如流，聘用了一批中年失業C9，將佢哋稍加訓練之後就安排佢哋出場開始所謂執勤，指揮一下的士埋站上客，在行人過路線亮紅灯時，幫忙截住行人別衝過馬路，諸如此類的幫閒角色，此舉在吸納失業人員之餘亦可以做到一點實事。
初時見到d輔導員大嬸穿起件反光背心，頭戴女警帽,口含哨子，在交通灯位截車，該車行就車行，該人行就人行，做得來似模似樣。
原來人係會日久成精嘅，一段日子之後，輔導員大嬸漸漸變得大模大樣神氣起來，簡直係三分顏色上大紅,佢哋許多時只係站在路口，幾個人各据一方，戴上一副墨鏡，讓人捉不住眼神，背握雙手，緊閉雙唇，一臉嚴肅，簡直就係一副cool樣，似乎在等住行人行差踏錯，好執行佢嘅神聖使命，佢哋台型十足，與阿sir沒有分別。
那天，輔導員大嬸終於等到我的出現，整定我係送羊入虎口，我正匆忙過路，當然我亦有看到她，但係我仍然貪方便三扒兩撥就跑過去，正在經過大嬸身邊時候被佢贈咗兩句，說我不該亂過馬路，俾佢窒咗兩句，當時我就滿心不高興，我明知輔導員大嬸只係恊管性質並無執法權力，於是我就反唇相稽：“收聲啦你! 揸住雞毛當令箭”，“大爺鍾意點行就點行，你吹咩!”。
這是我同交通輔導員大嬸其中一次的交手經歷。
前兩日路過某處，正在抬頭望天之際,俾一位輔導員大嬸叫停，只見佢手持一叠印刷品有所動作。我正要問佢：“叫我所為何事？”
只見佢用好輕挑嘅語氣講：“見你頭岳岳,梗係想揾巴士站啦！” “嗱！ 俾張夜間巴士路線單張你咯。”
原來如此。不過，我例牌要反駁兩句：“俾我都冇用，我夜晚都唔出街嘅。”
“俾你嘅細路睇囉！”，呢個大嬸總係替你想好理由去接收呢張宣傳單張，結果最後我都收咗放入袋才離開,做吓好事啦！大嬸要派完才可以收工。
交通督導員大嬸向路人派單張。
沒有留言:
張貼留言